O Hospital Meixoeiro realiza sesións de radioterapia pioneiras no mundo

Trátase dun método pensado para pacientes cunha función pulmonar moi minguada e que non admiten cirurxía nin ningunha outra técnica invasora, e aos que mesmo a radioterapia convencional tampouco resulta aconsellable, por canto non é posible comprometer nin un milímetro máis de tecido san.

Mediante o procedemento de parada respiratoria conséguese optimizar a precisión do tratamento e así presérvase de radiación a práctica totalidade do tecido que non está afectado, recalca a nota do Sergas.

Nesta intervención pioneira participaron oncólogos radioterapeutas, cirurxiáns cardíacos, anestesistas, radiofísicos, cardiólogos, técnicos, enfermeiros e persoal auxiliar.

O paciente escollido foi un home que ten un só pulmón cun tumor maligno non operable. A irradiación realizouse en tres sesións, entre as cales transcorreron 48 horas, e as comprobacións realizadas posteriormente mostraron resultados satisfactorios.