Obituario | Bruno Fuentes, exdirector de la coral de De Ruada

No ano 1964, despois de gravar catro EP coa casa Columbia, o daquela director Manuel de Dios abandonou De Ruada para rematar os seus estudos de Filosofía e Letras. Fíxose cargo da dirección, provisionalmente, o seu irmán Álvaro, pero abandonou a mediados de 1965 ao non poder compatibilizar este cargo co seu labor sacerdotal.

Probouse con dous directores, José Dacal e José Pascual, pero non deu resultado. Esta situación provocou unha das máis importantes crises que De Ruada tivo que enfrontar ao longo da súa historia. Sen director e sen directiva, soamente quedaban uns cantos fieis coralistas, mulleres e homes, que se reunían no local social situado nos baixos da parte traseira da Deputación, fronte á Coruñesa. Unha nova directiva, presidida por Xosé Ramón Muñiz e da que formaban parte Manuel Varela, Segundo Alvarado e Anxo Martínez, trataron de manter viva a institución incorporando novas voces e buscando novo director.

Varios cóengos da Catedral -Xosé Ramón Estévez, Bruno Fuentes e Raúl R. Pazo- achegáronse a De Ruada, a mediados de 1967, cunha interesante proposta: cantar a primeira misa en galego que se celebraría en Ourense. Xosé Ramón Estévez, coa axuda de Bruno Fuentes, dirixiu os primeiros ensaios dunhas pezas de misa que el mesmo compuxera. A Xosé Ramón Estévez custáballe asistir aos ensaios debido a que ao seu remate, xa de noite, tiña que regresar a pé ao seminario, onde vivía. Deste xeito cedeulle a dirección de De Ruada a Bruno Fuentes, que exercía o cargo de sochantre da Catedral dende mediados de 1965.

A primeira misa en galego celebrouse na capela do Santo Cristo da Catedral de Ourense o 7 de xaneiro de 1968 e, curiosamente, dirixiu a Coral Manuel de Dios, xa que Bruno Fuentes concelebrou a misa con Celso Pérez Carnero. Acompañaba, ao órgano, José Fernández García (Pepe Vide, o fillo do mestre Vide). Dende entón, celebrouse esta misa semanalmente durante varios anos. Bruno Fuentes continuou na dirección de De Ruada ata a celebración do seu 50 aniversario, no mes de outubro de 1969. Rematadas as celebracións, regresou Manuel de Dios.

Podemos dicir, polo tanto, que se debe a Bruno Fuentes a superación da difícil situación pola que pasou De Ruada a finais dos anos 60 do pasado século.

Co gallo do centenario da Coral, celebrado durante o ano 2019, unha representación de De Ruada, formada polo entón presidente Samuel Lago e o vicedirector Álvaro Iglesias, achegáronse á residencia sacerdotal da rúa de Lamas Carvajal para ofrecerlle un agasallo conmemorativo a Bruno Fuentes en agradecemento pola súa importante colaboración con De Ruada.

Descanse en paz na compaña dos directores Daniel González, Isolino Canal, Antonio Jaunsarás, Manuel e Álvaro de Dios, José María González e dos xa moitos coralistas do Alén.