Rodrigo Costoya Santos, defensor de la teoría del Colón gallego

Nome

Rodrigo Costoya Santos

Nacemento

Nado en Torrelavega en 1977

Profesión

Profesor de Educación Física no IES Rosalía de Castro en Santiago e escritor

Traxectoria

Percorreu en máis de trinta ocasións o Camiño de Santiago e é un dos grandes divulgadores da teoría da orixe galega de Colón

A orixe de Cristobal Colón foi motivo dun documental que foi emitido fai uns días e que analizaba as diferentes hipótesis que se coñecen ata o de agora. Alfonso Philippot Abeledo, falecido en Vigo fai tres anos, foi o impulsor da teoría da orixe galega do navegante e o plasmou na súa publicación “La identidad de Cristobal Colón”. Desa teoría da orixe galega de Colón tamén forma parte o escritor santiagués Rodrigo Costoya.

Unha das teorías sobre a orixe de Cristobal Colón o sitúa en Galicia. Cal é esa teoría? Na súa primeira novela,“Portosanto”, xa fala de esa orixe.

A teoría do Colón galego ten 135 anos de historia e acumula máis de cen indicios a favor, froito da investigación de numerosos estudosos galegos. É, sen dúbida, a teoría máis sólida de cantas hai, e a que conta con máis probas a favor. Na miña primeira novela, Portosanto, recreo a través da narrativa histórica o que sostén . En concreto, dentro dela, a póla que vincula a Colón coa figura de Pedro Álvarez de Soutomaior.

Qué probas reais poden soster esa orixe galega de Colón?

Máis de cen, algunhas dunha solidez fóra de dúbida. Pontevedra é o único lugar do mundo onde existe o apelido Colón no século XV. O almirante adxudicou máis de douscentos topónimos ás terras que ía descubrindo alén o oceáno propios das rías galegas. Por exemplo, chamoulle Miño ao meirande río de Xamaica, e Xallas a outro, que desemboca en fervenza. Falaba un castelán da época con moitos xiros galego-portugueses. Por exemplo, chamáballe cons ás pedras mariñas, como nas rías baixas. E a súa fala náutica era propia do atlántico. Pero a lista, como digo, é moi extensa: a nao Santa María foi construida en Pontevedra co nome de La Gallega, a Pinta regresou a Baiona, terras de Soutomaior, amizades, parentescos, heráldica... ata se fixo unha peritaxe caligráfica que determinou que os escritos de Pedro Madruga e Colón pertencían á mesma persoa. Por todo isto dicimos que a proba do ADN, no caso de dar uns resultados fiables, será unha máis. Pero sobran indicios a favor da teoría galega.

Nun documental fai uns días falouse de varias teorías sobre a orixe de Colón e nunha delas facía referencia a Galicia, pero todas descartarónse polo ADN.

Nese documental non se aportou nada. Faltou rigor científico, e as conclusións extraídas case semellan unha burla para calquera persoa con sentido común. O ADN non pode determinar se unha persoa comerciaba con seda, por exemplo. Foi un espectáculo moi decepcionante. E non o digo eu: a comunidade científica leva dende ese día denunciándoo nos medios de comunicación.

Por qué sempre damos por feito que Colon era Xenovés?

Colón supón un caso inaudito, pois fixo todo o posible por ocultar a súa auténtica identidade. Normalmente é ao revés. Pois ben, ante a ausencia de datos, colléronse como válidos os primeiros que apareceron. É curioso, porque el nunca dixo que fose xenovés, e os documentos onde se afirma tal cousa xa se consideraban falsos no século XVI.. Pero, cando non hai outra opción, cóllese a única que anda de boca en boca. O caso é que hoxe xa ningún investigador serio sostén a teoría xenovesa. Eu mesmo estiven en Xénova, e case dá risa ver a casa onde din que naceu...

Chegaremos a coñecer a súa verdadeira orixe o a estas alturas é misión imposible?

Coido que hai tempo que se sabe. A teoría galega acumula tal cantidade de indicios que resulta incomprensible que aínda non fose validada de xeito oficial. Outra cousa é saber que persoa en concreto foi a que ocultou a súa identidade tras ese nome inventado de Cristóbal Colón, pero que foi un nobre galego está fóra de dúbida para calquera persoa que coñeza os estudos. Por iso é frustrante que se antepoña un estudo coma o que presentaron en TVE a eses 135 anos de investigación seria e rigorosa.

Creo que xa está a ultimar a súa quinta novela. Pode adiantarnos algo?

Está rematada, agora estamos en proceso de revisión. Esperamos que sexa publicada a principios de 2025, e vai ser unha novela moi compostelá. Nela contaremos como unha pequena vila do Finis Terrae galaico, que non tiña máis que un pequeno santuario e unha reliquia demasiado dubidosa, se converteu en todo un faro da cristiandade, competindo e mesmo superando a Roma e Xerusalén como meta de peregrinación e chegando ata os nosos días. E, sobre todo, contaremos como todo iso foi obra dunha única persoa. O meirande xenio político da nosa historia e un dos máis grandes de todo o mundo. O que construiu a catedral, coroou reis, mandou elaborar o Códice Calixtino, inventou o Voto de Santiago, entronizou papas e creou novos reinos que chegaron aos nosos días. Esa é a próxima novela.