O corazón da xoven ciencia escolar reuniuse en terras trivesas

Trives converteuse nun pequeno laboratorio de ideas e descubrimentos co VII Congreso Científico da Montaña, unha cita xa consolidada que este ano reuniu arredor de 250 rapaces e rapazas de 11 centros educativos das provincias de Lugo e Ourense.

Aínda que a celebración estaba prevista para finais de abril, un apagón obrigou a adiar o evento e reorganizar parte do programa. Mesmo así, a ilusión non minguou, e durante dous días, o CEIP Manuel Bermúdez Couso e o IES Xermán Ancochea, sedes do congreso neste 2025, acolleron presentacións, obradoiros, espectáculos científicos e moitas horas de convivencia.

A pesar do nome, o Congreso Científico da Montaña vai moito máis alá das ciencias naturais, buscando que o alumnado traballe ao longo do curso empregando o método científico e que presente os seus proxectos ao resto de compañeiros. Os traballos abordaron temas como bioloxía, tecnoloxía, historia, música, matemáticas ou educación física.

O primeiro día, os estudantes de Primaria montaron os seus “stands” no colexio, creando unha auténtica feira da ciencia onde explicaron os seus proxectos. Mentres tanto, no instituto, o alumnado de Secundaria presentaba as súas propostas cun formato máis expositivo, en intervencións breves de cinco minutos. En total, déronse a coñecer 18 traballos. A tarde continuou con máis actividades: para Primaria, un obradoiro do CSIC sobre os incendios forestais e un espectáculo científico; para Secundaria, xogos cubertos como alternativa a unha ruta de sendeirismo frustrada pola choiva. A xornada rematou con cea conxunta e unha velada nocturna diferente para cada grupo.

O segundo día, tras o almorzo no colexio, todos subiron á Estación de Montaña Manzaneda, onde as actividades foron máis físicas, pero igual de motivadoras. A despedida foi informal, comendo xuntos uns bocadillos antes de que cada grupo regresara ao seu centro, cun feixe de experiencias na mochila.

O congreso, que leva sete edicións celebradas, é unha iniciativa compartida por todos os centros participantes. A comezo de curso deciden entre todos o lugar, as datas e as tarefas organizativas. Neste 2025, Trives asumiu con orgullo a responsabilidade de acoller o evento e coordinou a loxística con éxito.

A organización recalca que este tipo de encontros son moito máis que unha actividade académica. Son un espazo para coñecer outras realidades, compartir ideas, fomentar o espírito científico e, sobre todo, tecer lazos entre centros que, aínda estando separados por quilómetros de montaña, comparten as mesmas gañas de aprender e construir futuro no rural.