Ruta pola riqueza natural e cultural de Trives cos nenos

A asociación de nais e pais O Recreo, do colexio trivés, levou a cabo esta fin de semana unha actividade na que participaron arredor de trinta andaríns.

Pasaban das 11,30 horas da mañá cando os cativos, acompañados de maiores, iniciaban a súa particular andaina desde a vila de Manzaneda ata o pobo de Sobrado, xa no Concello de Trives. O mal tempo e choiva de meses pasados fixo que desde a organización tiveran que cambiar o percorrido da mesma ante a imposibilidade de cruzar o río, evitando tamén os camiños mollados. A pesar diso, os cativos cruzaron os camiños entre soutos de castiñeiros ata chegar ao pobo de Sobrado, alí a Igrexa do século XII agardaba a súa visita coas portas abertas e a súa historia agardándoos.

Algúns membros do grupo de teatro da asociación trivesa A Caniceira levaron aos cativos ata o tempo das abadesas do mosteiro de Sobrado e a súa loita, apoiadas polos veciños do pobo, para que non as botaran do mosteiro, achegándolles así a nenos e maiores coñecemento do importante monumento románico e a historia que ten.

Ao remate do conto e da visita ao interior da igrexa, a súa ruta continuou coñecendo as súas rúas ata a casa do pobo onde todos xuntos disfrutaron dun picnic e mesmo dun biscoito feito por algunhas veciñas para os máis cativos.