O San Blas encherá Vilanova, en Trives, de fogueiras

Vilanova, na Pobra de Trives, enche o ceo de fume e os soutos e luz, calor e fogueiras coa súa centenaria Festa do Chourizo. O sábado 1 de febreiro, o monte será o escenario dunha xornada que combina a tradición coa camaradería.

Ao redor das fogueiras, veciños e visitantes reuniranse para asar viandas, combater o frío e compartir momentos de festa entre amigos, familiares e pandillas. Esta celebración está profundamente enraizada na cultura local.

Pero a fin de semana en Vilanova ofrece máis que chourizos asados e fogueira. Celebran as festividades das Candelas e o San Blas, atraendo a devotos de toda a comarca.

O sábado, a xornada arrinca cunha misa solemne en honra á Virxe das Candelas ás 13,00 horas coa actuación do Orfeón Trives. A continuación, a Charanga Nova Trives amenizará a sesión vermú, preludio perfecto para o estoupido de festa coa música do Trío Nostalgias e DJ Bady, combinando a pista de baile na súa carpa co lume das fogueiras espallados polos soutos próximos ao campo da festa.

O domingo, a devoción dá paso ao San Blas, cun pasacalles matutino, para abrir a xornada, coa Charanga Nova Trives. Ás 13,00 horas terá lugar a misa solemne e despois continuará a Charanga Nova Trives coa sesión vermú.