O Bolo xa ten plan para frear o despoboamento

O Concello do Bolo vén de dar a coñecer o seu Plan Municipal de Vivenda e Chan 2024-2029, unha iniciativa “pioneira” en Galicia que pretende recoller as necesidades de vivenda do municipio, analizar o estado dos inmobles actuais e marcar obxectivos e estratexias para os vindeiros cinco anos, co fin de combater o despoboamento e fixar poboación.

A presentación tivo lugar no Castelo e contou coa participación do subdelegado do Goberno, Eladio Santos; do alcalde, Alberto Vázquez; da concelleira Mayra Martínez, e do equipo de arquitectos: Luis Álvarez, Rosario León e Silvia Arias.

Santos destacou que o plan, elaborado polo estudo Luis Álvarez Arquitectura, permitirá que O Bolo “estea posicionado estratexicamente para cando saian as liñas de axuda para a vivenda tanto da Administración central como da autonómica”. Nesa mesma liña, o alcalde apuntou que “con el iremos chamando ás portas da Administración para explicar os problemas de vivenda que ten este concello”. Pola súa banda, o arquitecto Luis Álvarez afirmou que se trata dunha iniciativa “novidosa, en Galicia é un dos primeiros plans que se fan deste tipo”.

Aposta polo futuro

Dende o Concello do Bolo insisten en que con este plan, que estará asometido á participación cidadá, apóstase polo futuro, polo freo á perda de poboación e pola dinamización económica, garantindo o dereito á vivenda dos habitantes do Bolo e da comarca.

Este proxecto conta co financiamento do Ministerio para a Transición Ecolóxica e o Reto Demográfico, no marco do Plan Estatal de Acceso á Vivenda 2022-2025 ao que está acollido O Bolo.