A falla de pediatras volve a area política en O Barco

O grupo municipal do BNG no Concello do Barco de Valdeorras vén de rexistrar unha moción na que sinala a situación da pediatría no distrito valdeorrés, debido a que as tres prazas de pediatría do centro de saúde están neste momento “vacantes”, trala xubilación do único pediatra “a primeiros de novembro”.

Por ese motivo, a formación insta á Xunta a garantir a atención sanitaria en medicina primaria dos nenos do distrito sanitario de Valdeorras por parte de especialistas en pediatría “de xeito permanente”, e dá traslado da súa solicitude aos alcaldes e corporacións municipais do resto de concellos da área sanitaria.

Na exposición de motivos, o BNG apunta a que o distrito sanitario de Valdeorras abrangue “dende Viana do Bolo ata Rubiá, Manzaneda, O Barco, Larouco ou Carballeda”, e polo tanto a carencia de pediatras “afecta á cativada do distrito, nunha comarca moi extensa e montañosa, con déficit de comunicacións”.+

Apoio aos pais e nais

Os nacionalistas subliñan que os pais e nais de Valdeorras veñen denunciando a situación pediátrica “dende a pasada primavera”, e engade que a asistencia sanitaria é un “dereito básico e primordial, sobre todo para os miúdos”.