Verea homenaxea a Elías Valiña, inventor das frechas amarelas do Camiño de Santiago

CLAVE NO REXURDIR DAS PEREGRINACIÓNS

Durante o acto terá lugar a estrea dun documental sobre Elías Valiña, o crego do Cebreiro, estudoso e prercursor do asociacionismo xacobeo

Elías Valiña nos 80, fotografado para a súa obra “Boletín Xacobeo”. | Arquivo da familia Valiña.

A casa da cultura do Concello de Verea acolle este sábado, a partir das 16,00 horas, unha homenaxe a Elías Valiña Sampredo (1929 - 1989), o crego que foi o principal responsable do rexurdimento das Camiños de Santiago no século XX. Párroco do Cebreiro durante 30 anos, tamén foi o creador das frechas amarelas que sinalan o Camiño, e que se teñen convertido en símbolo universal da peregrinaxe a Compostela.

Durante o acto estrearase a curtametraxe documental “Elías Valiña, o inventor das frechas amarelas”, dirixida polo cineasta e documentalista Aser Álvarez. Nel recupérase a figura de Elías Valiña como un dos principais estudosos e precursores do asociacionismo xacobeo, pero tamén un dos actores fundamentais no rexurdimento contemporáneo do fenómeno das peregrinacións a Santiago.

Exposición con guía

A xornada completarase cunha visita guiada á exposición “Os camiños de Elías Valiña”, que se amosará por vez primeira no Camiño de San Rosendo. Este proxecto documental multimedia de Acude Rural, dispoñible en eliasvaliña.gal, realizouse co apoio de Arraianos Producións, ao abeiro do programa O teu Xacobeo da Xunta.