O 80% dos expositores volvería participar na Feira de Nadal de Verín

O Concello de Verín fai un balance “notable alto” desta última Feira de Nadal, froito das enquisas realizadas polos expositores, nas que a organización obtén unha valoración global de 7,84.

Un 80% dos expositores asegurou que volvería participar o ano que vén, mentres que un 20% non respondeu ou non o especificou. Ademais, o 88% manifesta a intención de acudir á vindeira Feira do Lázaro.

O resto de resultados reflicten un nivel de satisfacción xeral elevado, con aspectos organizativos que continúan mellorando e unha fidelización “crecente” dos participantes, que salientan os expositores, o horario, a ubicación e a limpeza, e que tamén lle dan un aprobado ás vendas, organización, música e actividades complementarias.

O concelleiro de Transporte, Feiras e Hostalería, Manuel Lourenzo, destacou que “os datos amosan unha tendencia de estabilidade e mellora, cunha valoración xeral notable e cunha resposta moi positiva sobre a continuidade dos expositores. A fidelización é clave para consolidar este evento como referente comercial e social do noso Nadal”.

O premio ao mellor expositor desta edición, que se estendeu tamén ao luns 8, foi para “Magari Clay”, de Ariadna Uría.