Gran acollida das “citas rápidas” para emprendedores no Polo de Verín

O Polo de emprendemento e apoio ao emprego de Verín acolleu onte unha novidosa actividade de networking. Como de costume, o obxectivo deste tipo de sesións é o de pór en contacto de xeito persoal a distintos profesionais.

Sen embargo, desta vez levouse a través de “citas rápidas”, breves e rotatorias, nas que os participantes tiñan entre 5 e 10 minutos para coñecer os seus respectivos perfís e emprendementos.

Nesta xornada, na que colaborou o GDR-9 Monteval, participaron de 25 emprendedores da comarca de Monterrei, pero tamén doutras como A Limia, Baixa Limia e Allariz-Maceda. Os profesionais, que teceron posibles sinerxias e colaboracións laborais, proviñan de sectores tan diversos como a organización de eventos, a artesanía, o coliving, o turismo rural ou a psicoloxía.

A dinámica estivo dirixida polo experimentado dinamizador Dani Diéguez, quen se encargou de explicar o formato e a “tarxeta de entrevista” que os emprendedores debían encher sobre cada un. Ao remate tivo lugar un aperitivo, no que os participantes puideron seguir “conectando” entre si mediante o uso de notas adhesivas.

“Crear unha rede”

Ao inicio da actividade tomou a palabra José Luis Maestro, subdirector xeral de emprendemento da Xunta, quen salientou que as empresas que tecen unha rede de apoios son “máis exitosas”.