Londres e Nova York amosarán a obra do fotógrafo verinense Carlos Folgoso Sueiro

O fotógrafo verinense Carlos Folgoso Sueiro, gañador da XII edición do Premio Galicia de Fotografía Contemporánea polo proxecto “Alén do lago”, exporá esta primavera as fotos que a compoñen en capitais coma Londres e Nova York.

Nos últimos meses, o seu retrato persoal e particular do territorio e da xente de Galicia vén de ser escollido e premiado nalgúns dos principais certames fotográficos do mundo.

Por unha banda, a obra máis recente de Folgoso Sueiro foi unha das seleccionadas na categoría “Perspectivas” dos Sony World Photography Awards 2025. A consecuencia disto, exporase ao público no edificio londinense Somerset House, un dos maiores edificios históricos de Gran Bretaña, do 17 de abril ao 5 de maio.

A súa visión do rural galego tamén se poderá ver en xuño no Photoville de Brooklyn (Nova York), tras recibir o premio Zeke á mellor fotografía documental da Social Documentary Network.

No marco do Premio Galicia está previsto que se expoña en maio en Lugo. Tamén visitará Verín proximamente, nun lugar e data aínda por confirmar.

“Orgullo” pola acollida

Para Folgoso Sueiro, a acollida que está a recibir “Alén do lago” supón todo un “orgullo”, xa que é unha obra que nace “da dor, dun periodo de estancamento a nivel profesional; comecei a facer estas fotos dun modo sincero, sen pretender facer ningún proxecto”.

Ademais asegura que é a súa creación “máis persoal”, dado que moitas das fotografías “son da casa, da miña familia, da casa dos avós, en Atás, e que se expuxeran en museos coma o Hermitage de San Petersburgo ou agora en Nova York é toda unha satisfacción”.