Música, mercado e tiro con arco completarán a xornada "irmandiña" en Verín e Monterrei

A comarca de Monterrei prepárase para vivir este domingo unha xornada histórica coa celebración da primeira edición da carreira de obstáculos A Revolta Irmandiña. Máis de 300 persoas participarán neste evento deportivo e cultural que une os Concellos de Verín e Monterrei, coa organización Ktorce e apoio de Xunta e Deputación.

Para complementar esta proba inspirada na Revolta Irmandiña, a xornada terá unha ampla programación paralela para tódolos públicos. No entorno da Preguiza instalarase unha zona de mercadillo con oito postos que ofrecerán desde artesanía local ata produtos ecolóxicos e solidarios.

Ademais haberá amenización musical en directo da man de Candaira, acompañada por música ambiente, así como tiro con arco. Ao remate da proba, participantes e público compartirán un xantar popular.

A programación infantil “Irmandades Miúdas” converterá aos máis pequenos en protagonistas, grazas a xogos, probas adaptadas e contidos lúdicos inspirados no espírito irmandiño, para educar e divertir ao mesmo tempo.

Último día do Pincho Irmandiño

A tarde-noite do sábado é a última oportunidade para degustar o “Pincho Irmandiño”, unha ruta con ingredientes medievais por 10 locais de Verín: Tapería Rúa Maior, San Roque, Bar Cafetería O Tixo, Brétema, Oh Caruso, Gandainas, Enredo, O Ferro, Almae e Luan’s.