A película ambientada no Entroido proxectarase no cine municipal de Verín

O salón de actos da Casa da Cultura de Verín volverá ofrecer unha programación estable de cinema comercial de estrea, con títulos para tódolos públicos, empezando este venres con “San Simón”, ás 20,30 horas. Esta fin de semana tamén se proxectará a película de animación “Los tipos malos 2”.

O cinema municipal de Verín acollerá o vindeiro mes a estrea de “Me has robado el corazón”, mestura de road movie e comedia romántica protagonizada por Óscar Casas e Ana Jara que se rodou este ano en Laza, no Riós e Verín en vésperas do Entroido. A rodaxe foi todo un evento na comarca, e centenares de veciños fixeron de extras e simularon o Luns Borralleiro lazao e o Xoves de Comadres na vila do Támega.

Dende que esta iniciativa do Concello botou a andar no ano 2016, converteuse nun punto de referencia na axenda cultural verinense, achegando unha alternativa de ocio de calidade e permitindo desfrutar das últimas novidades da carteleira sen saír do municipio. As entradas, cun custo de cinco euros, poden mercarse 30 minutos antes do inicio de cada sesión.

Programación

Este venres arranca ás 20,30 horas a tempada de cinema comercial co filme “San Simón”, que tamén se proxectará o sábado e domingo, ás 19,30 e 22,00 horas. Eses días ofrecerase “Los tipos malos 2” ás 17,00 horas, así como a vindeira fin de semana, cando compartirá cartel coa comedia “La cena”. Para desfrutar de “Me has robado el corazón” tocará agardar ata a ponte da Constitución.