O PP de Verín denuncia unha recollida do lixo “deficiente e cara”

O PP de Verín alerta sobre a “insalubridade” que xeran as graves carencias no servizo municipal de recollida de residuos sólidos orgánicos. Segundo os populares, a decisión do bipartito de asumir en solitario este servizo provocou un claro “empeoramento”, existindo aldeas nas que o lixo se chega a acumular nos colectores “ata dúas semanas sen ser recollido”.

Á falta de recollida “habitual, non puntual”, súmase un incremento das taxas. A trimestral para vivendas urbanas aumentou un 62%, ata os 23,50 euros, e no rural subiu ata os 16,50 euros. Afirman que o comercio e a hostalaría local tamén padeceron importantes encarecementos na súas facturas.

A formación lembra que o Concello abandonou a Mancomunidade no 2019 para xestionar o servizo de xeito municipal, prometendo un abaratamento que nunca se cumpriu. Equiparan esta situación coa xestión municipal da auga, que xa lle custou 875.000 euros ao Concello.