O PP de Verín esixe ao alcalde que dimita e deixe de “inventar historias”

O grupo municipal do PP verinense gardara “silencio” durante o recente proceso que rematou coa sentenza condenatoria contra o alcalde, Gerardo Seoane, “en sinal de respecto á xustiza”.

Pero este luns, a voceira, Lara Da Silva, e o presidente local, Jiménez Morán, esixiron a súa dimisión “dunha vez”, e cominárono a “deixar de inventar confabulacións e historias, facerse o inocente, botar a culpa a funcionarios e xuíces e respectar a lei”, xa que nada diso é “crible” nunha persoa “que é arquitecto”.

Malia que o fallo por un delito contra a ordenación do territorio por unha intervención na contorna da igrexa de Queirugás “aínda non é firme”, Da Silva afirmou que esta actitude era “reiterada”, de aí os “máis de 700” reparos de legalidade que acumula Seoane, o informe de tesourería e intervención que transmitía “preocupación” pola situación económica e falta de “colaboración”, e os “constantes requerimentos” doutras administracións. Todo iso resúmese en que en decembro terá “un novo xuízo por desobediencia á autoridade”.

“Pensa que é o sheriff”

Jimenez Móran, quen afirmou que se “vía na obriga de falar por alusións”, apuntou que Seoane “cre que é o sheriff por enriba da lei”, e que non é a primeira vez que actúa ”con premeditación” e sen “informe nin permiso de Patrimonio”. Puxo como exemplo o derrubamento “da óptica da rúa Lisa”, que realizou “cedo pola mañá, antes de que chegara a policía autonómica”.

O popular engadiu que estas “malas prácticas” provocan que o último secretario “denunciase a Seoane por vulneración de dereitos fundamentais”. Ademais, hai un par de semanas, “varios inspectores do Consello de Contas botaron cinco días inspeccionando os numerosos incumprimentos”, polo que o presidente local amosouse “convencido” de que o seu ditamen será “moi grave”.