Graciela Diéguez: “Ser a primeira alcaldesa de Viana é un orgullo”

Graciela Diéguez (BNG) asumirá a alcaldía de Viana o próximo 18 de agosto tras o acordo alcanzado co PSdeG, que permitiu a Germán García-Ávila ocupar o cargo durante os primeiros 11 meses do mandato. Con esta toma de posesión converterase na primeira muller en gobernar o Concello de Viana. Diéguez xa ten experiencia na política municipal, tras exercer como concelleira de Cultura, etapa na que deixou unha importante pegada pola súa xestión.

Pregunta. Converterase na primeira muller alcaldesa da historia de Viana. Que significa para vostede asumir esta responsabilidade e que valor lle dá a este fito histórico?

Respuesta. Doulle moitísimo valor. Por primeira vez unha muller accederá a alcaldía de Viana, é un orgullo e unha alegría ser a primeira alcaldesa do meu pobo. Lémbrome de todas as mulleres que están na miña memoria, e gustaríame que se sintan representadas por esta alcaldesa ao igual que tódalas veciñas e veciños de Viana. Trátase dunha responsabilidade enorme que afronto con moitas ganas e moita ilusión.

P. Chega á alcaldía froito dun acordo de goberno co Partido Socialista. Como valora estes primeiros meses de mandato compartido e como foi o proceso para chegar a este entendemento?

R. Nas eleccións municipais do ano 2023, Viana falou e quixo que gobernara unha maioría de progreso. O entendemento co PSdeG non foi doado, pero finalmente logramos chegar a un acordo de goberno para a recta final de esta lexislatura, xa que a parálise na que estaba sumido o goberno do PP facía necesario este pacto. Penso que a veciñanza o agradece, e que se conseguiron desbloquear asuntos moi importantes para os veciños, como por exemplo o SAF. Valoro positivamente o acordo, no que o BNG demostrou que é un socio leal e fiable.

P. Asume o cargo a poucos meses das próximas eleccións municipais. Que obxectivos se marca para esta etapa ata maio?

R. O obxectivo prioritario é ser un concello de portas abertas, que escoite a veciñanza e que traballe e solucione os problemas dos veciños, sen esquecerse de ningún e acordandose de tódalas nosas parroquias e aldeas. Tamén gobernar con diálogo, transparencia e respeto, poñendo sempre por diante o interese xeral de Viana.

P. Volve á primeira liña municipal despois da súa etapa como concelleira de Cultura. Que aprendizaxes lle achega aquela experiencia para afrontar agora a alcaldía?

R. Sempre estiven. Foron anos de moitísimo traballo, xunto aos meus compañeiros de goberno, pero tamén anos moi ilusionantes porque conseguimos reverter a situación de desleixo na que o PP tiña sumerxida a Viana. Durante eses anos, dende o goberno do BNG puxemos a Viana no lugar que se merecía en tódolos aspectos, tanto na mellora de infraestruturas como na humanización da nosa vila e os seus pobos, así como nas miñas competencias de goberno, asentando as bases dunha política cultural e social das que agora se recollen os froitos: creación das escolas deportivas e musicais no noso concello, programación cultural que nada tiña que envexar a dunha cidade, colaboración e posta en valor das asociacións deportivas, culturais e veciñais; así como cos centros educativos.

P. Cal considera que é actualmente o principal reto de Viana?

R. O primeiro reto de Viana é, por desgraza, a recuperación das zonas do noso concello afectadas pola riada do 17 de xuño. Ese será o meu primeiro e máis importante reto. Pero non podemos olvidar que Viana ten un enorme potencial, cunha paisaxe excepcional, unha cultura viva, patrimonio único, e sobre todo persoas traballadoras que nunca deixaron de loitar pola súa terra. Temos que darnos a coñecer e favorecer as posibilidades de vida aquí, temos que traballar en fortalecer o rural, impulsando os servizos públicos necesarios, a creación de oportunidades para a mocidade e garantir que as persoas maiores poidan vivir con dignidade.

P. Mirando cara ás eleccións de maio, que balance lle gustaría poder presentar cando remate esta etapa?

R. Serán as veciñas e os veciños os que teñan que facer ese balance. Espero que sexa positivo. Neste curto espazo de tempo espero levar a cabo a maioría dos proxectos que temos, e pola miña parte non quedará. Serei a alcaldesa de todas.

P. Se tivese que resumir nunha frase o espírito co que chega á alcaldía, cal sería?

R. Traballarei por e para unha Viana mellor.