O concello de Vilar de Barrio aposta pola súa masa forestal

O proxecto Cares, unha iniciativa orientada á valorización dos recursos naturais e ao fomento da economía rural, celebra mañá en Vilar de Barrio a segunda sesión do curso formativo centrado nas novas técnicas de resinación como un modelo de explotación sostible das grandes masas forestais.

A primeira das tres sesións formativas deste proxecto celebrouse a pasada semana, e nela participaron veciños e veciñas do municipio xunto con alumnado do Ciclo Formativo de Xestión Forestal e do Medio Natural do IES Cidade de Antioquía, de Xinzo.

A primeira sesión tivo carácter teórico, centrado nos “fundamentos técnicos, ecolóxicos e económicos da resinación moderna”, mentres que esta semana, as sesións de mañá e a do xoves, dedicaranse á experimentación práctica en campo e unha explotación resinera en activo en Chaves (Portugal).

O proxecto “subliña a relevancia estratéxica da resinación como alternativa produtiva que contribúe simultaneamente a combater o despoboamento e a manter os montes limpos e activos, reducindo o risco de incendios forestais”, explicou Manuel Conde, alcalde de Vilar de Barrio. “Nun contexto de cambio climático e abandono do rural, a recuperación de oficios tradicionais vinculados ao monte, adaptados á innovación e a sustentabilidade, perfílase como ferramenta esencial para a revitalización económica e ambiental do territorio”.