O escritor Pedro Feijoo festexa en Rebordechao, territorio de Romasanta, o lobishome de Allariz

O escritor Pedro Feijoo (Vigo, 1975) mudouse hai un ano á aldea de Rebordechao, en Vilar de Barrio, onde viviu o primeiro asasino en serie de Galicia, Manuel Blanco Romasanta, o lobishome de Allariz.

Daquela estaba inmerso no proceso de investigación e escritura que culminou na súa última obra, “Onde nacen as bestas”, publicada o mes pasado, e quedou “atrapado” polo lugar.

No libro, que mestura novela negra con thriller, unha serie de novos asasinatos lembran o único caso documentado de licantropía clínica acontecido no país.

Feijoo, que segue a vivir neste núcleo, levaba un tempo querendo agradecer a acollida recibida pola veciñanza cunha festa: “Se esta novela ten verdade e alma é grazas aos veciños de Rebordechao, que me acolleron como un máis dende o primeiro día e que compartiron comigo todo isto. Tiña pendente pagar cariño con cariño e dicir publicamente que, sen esta xente, este traballo non tería esta forma nin este fondo”.

Na xornada participaron preto dun centenar de amigos e habitantes de Rebordechao, incluídos algúns ilustres como o forense Fernando Serrulla ou os irmáns Castro Vicente, expertos no “Sacaúntos de Allariz”.

O día arrancou co novelista facendo soar a campá da aldea, tralo que se celebrou un animado xantar, convite do escritor, no que os asistentes o agasallaron con, entre outros presentes, “un pouco de unto e xarras con cada un dos seus libros”, asegura unha das organizadoras, María José Gómez.

Á tarde houbo unha andaina ata o Pozo dos Mouros, que aparece na novela e no que Feijoo se mergullou, e onde fixeron un “aquelarre” baseado en antigas lendas relacionadas con Romasanta.