O II Certame Literario Antón Tovar repetirá o seu xurado

O Museo da Limia acollerá o vindeiro 14 de xuño ó II Certame Literario Anton Tovar, que repetirá o mesmo xurado que na edición anterior.

Para participar no certame deberanse presentar creacións orixinais e inéditas, escritas en lingua galega, en prosa ou en verso, cunha extensión máxima de 400 palabras para os textos en prosa e de 30 versos para as composicións poéticas. As obras deberán ter relación temática ou biográfica co poeta.

O prazo de presentación remata este venres, 25 de abril, e o gañador darase a coñecer en maio, antes do evento que terá lugar o 14 de xuño no Museo da Limia.

Delfín Caseiro Nogueiras, presidente do Padroado do Museo da Limia, comenta que o xurado está formado por persoas ligadas ó Museo da Limia, “persoas vinculadas ó territorio que sexan representativas de distintas sensibilidades sociais”.

“Procúrase a diversidade de opinión, que sexa un xurado plural e representativo”, engadiu o presidente. “O noso obxectivo é que a Limia sexa un territorio cada vez máis literario”, rematou.

Letras Galegas

Este ano presentarase, por terceira vez, a candidatura para que o Día das Letras Galegas se lle dedique ó poeta limiao. Delfín Caseiro explica que o ano pasado quedou “a moi poucos votos” de que se lle outorgase este recoñecemento a Tovar e di que “a terceira vai a vencida”.