Tributo a Carlos Canal, o "rapaz de aldea" que compite na elite do ciclismo

O ciclista Carlos Canal Blanco (Xinzo de Limia, 2001) recibiu este sábado, nun ateigado salón multiusos do Concello de Vilar de Santos, o premio Pedra Alta que concede o padroado do Museo da Limia. A organización quixo nesta oitava edición render homenaxe a un limiao que, malia a súa idade, xa forma parte por dereito propio da elite mundial do seu deporte, ao tempo que se pon en valor a bicicleta como medio de transporte sostible e de fondo enraizamento na comarca.

O integrante do equipo Movistar pechou así a súa mellor tempada na "Champions League" do ciclismo -2º na Coppa Agostoni, 3º en Dunkerque, 4º no Tour de Valonia e top 20 no mundial de Ruanda, un dos máis duros da historia- cun premio “moi especial” para el por ser “valorado na casa e querido pola veciñanza. Sinto o apoio incondicional de limiaos e ourensáns cando compito polo mundo”.

O deportista aproveitou a súa intervención para agradecer o padroado por escollelo entre as 12 candidaturas deste ano, así como a presenza de representantes institucionais da comarca e provincia. Tamén lembrou á familia, “os pais son os primeiros patrocinadores que ten un deportista”, e a Xulio Conde, director técnico do CC Maceda, onde entrou con 14 anos. Por último, Canal animou a todos a usar a bici, un medio “sostible e saudable, temos unha orografía perfecta para desprazarnos nela”, aludindo á chaira limiá.

“Un bo rapaz de aldea”

O premiado recibiu a réplica en granito da Pedra Alta, obra do escultor Xosé Lois Carreira, da man de Ezequiel Mosquera, exciclista galego, e subcampión na Vuelta a España 2010. O de Teo definiu a Canal como un “rapaz de aldea e bo rapaz que ten as virtudes precisas para competir cos mellores do mundo: calidade e capacidade de traballo”.

Ao inicio xustificou o premio o coordinador do padroado, Antón Jardón, quen falou do sentido de pertenza que “acompaña a tódolos limiaos”, así como da necesidade de “substituír o autoodio por autoestima, reivindicando o noso, especialmente a memoria colectiva, para entendermos o presento e o futuro”. Como colofón, o presidente do padroado, Delfín Caseiro, lembrou a historia de superación, coa bicicleta como medio de transporte popular na Limia a mediados do XX, do “Cego da Pereira”.

Trala interpretación do himno a cargo de Luis Humberto Cao e Baldomero Pavón, un xantar popular puxo o broche a esta xornada de deporte e orgullo limiaos.