Melisa Macía toma o mando do PP de Vilariño de Conso

Melisa Macía Domínguez (Vilariño de Conso, 1990) foi elixida presidenta da agrupación do Partido Popular da súa vila natal, no congreso local celebrado nesta localidade e que foi clausurado polo presidente provincial, Luis Menor.

O representante popular destacou a notable traxectoria política da que foi no seu momento -en 2017 con 27 anos- unhas das alcaldesas máis novas da provincia e unha das máis mozas de España. Luis Menor lembrou a súa traxectoria, que a levou a encabezar en 2019 a candidatura do PP obtendo a maioría absoluta, un fito que revalidou no actual mandato.

O presidente provincial engadiu que Melisa Macía reforza a súa figura como “persoa de referencia do partido no territorio, e o seu cometido será axudar a fomentar a participación, garantir a cohesión e involucrar a afiliados e simpatizantes no proxecto do Partido Popular”.

Pola súa banda, a nova presidenta da agrupación local de Vilariño de Conso puxo énfase no “importante paso que supón este congreso para organizar o partido”, sinalando que entre os seus primeiros desafíos figura involucrar a persoas simpatizantes, “escoitando a todo o mundo, sexan ou non do PP, que é a base de todo traballo político”.