“Nós facemos rock ao noso xeito, á maneira de Habitación Vudú”

O festival OU Yeah! chega hoxe á vila limiá para ofrecer unha noite de rock. Habitación Vudú e La Guardia son os grupos que se encargarán de facer as delicias dos presentes, especialmente para os limiaos, que poderán desfrutar unha vez máis do seu grupo e na súa casa. O festival arrinca con Habitación Vudú ás 21,30 horas.

Habitación Vudú naceu en 2011 en Escornabois, Trasmiras, de onde son dous dos seus compoñentes, Justo e Jose Freiría, irmáns que comparten o amor pola música, e que xunto a Rubén, comezaron a darlle forma ó grupo. Logo uniuse Richi, guitarrista ourensán.

Falamos con Jose Freiría, vocalista do grupo, quen explica que Habitación Vudú naceu logo de que el, Justo e Rubén, “compañeiro que xa non está, por desgracia”, comezasen a ensaiar e se decataran de que “podía ir adiante”.

“Xusto antes de que Rubén marchara graváramos os baixos e baterías de dúas ou tres cancións novas”, contou Jose, e continuou explicando que o material “estaba aí”, e logo de deixar pasar un tempo pensando en que facer, “decidimos todos que as cancións que tíñamos saíran a luz por el, e nós decidimos levantarnos e seguir”.

O primeiro EP puideron gravalo grazas ao apoio de “cento e pico mecenas da Limia e outras zonas da contorna, ós que lles estaremos eternamente agradecidos”, o que creou un vínculo que aínda perdura hoxe.

Pregunta.Como definiría o rexistro de Habitación Vudú?

Respuesta.Eu penso que facemos rock á nosa maneira, coas nosas influencias variadas de todos os gustos que temos no grupo. Diría que é rock ao noso xeito, á maneira de Habitación Vudú.

P.Que opina das novas tecnoloxías á hora de producir música?

R.Eu opino que a tecnoloxía depende do uso que se lle dea, e se tes a facilidade de poder gravar un tema na casa, estupendo, pero cando a xente se pon a facer cousas de calquera xeito pensando que todo vale, iso non é así. Para min é tan válida unha gran produción nun estudo de Los Ángeles con millóns de dólares detrás que unha canción gravada nunha casa, se está ben feito é o que conta. Ir contra a tecnoloxía é absurdo, pero hai que aproveitala para ben.

P.A distribución da música tamén cambiou moito...

R.Si, e ten dúas cousas que non me gustan das novas plataformas de streaming. O primeiro é que todo é moi efémero, ás dúas semanas unha canción é vella e xa pasou de moda.

R.A segunda é que ó final a forma que teñen os artistas de facer rendible a súa música é menor, agora tes que conseguir que te escoiten o triplo de persoas nestas plataformas para gañar o mesmo que antes, cando se vendían máis CD.

P.Como valora o estado da música en directo?

R.Agora é moi complicado por tódolos gastos e inversión que require, nós onde poidamos ir que non palmemos pasta, aí imos. O público tamén cambiou moito coa nova maneira de ir ós festivais. En Galicia estamos moi saturados de oferta no verán, o que fixo que a xente non vaia desfrutar tanto da música, senón porque mola estar alí. A xente vai pasalo ben e dálle igual quen toque.

R.Isto está moi ben para que a roda siga andando, pero que haxa público que vaia por todo menos pola música, é que algo está fallando.

R.Nós ó ser un grupo máis pequeno non padecemos diso, xa que a xente que vén é porque nos coñece ou porque quere desfrutar de música en directo.

P.Que podemos esperar de Habitación Vudú hoxe?

R.Nós somos sinceridade encima do escenario, á hora de tocar e cantar. Hai moitos grupos mellores e máis técnicos ca nós, pero cada grupo ten o seu aquel e creo que os amantes da música o van desfrutar.

R.Mola tocar na casa e mola que un evento como o Ou Yeah! veña á Limia. O que non saiba se vir, que non o dubide que vai ser unha pasada ver a La Guardia, un grupo que leva en activo dende os 80 e que aínda hoxe teñen un directo incrible nun entorno como o Toural.

P.E para os fans, presentes e futuros, haberá novos temas?

R.Si, estamos esperando que acabe o verán para meternos ó estudio coas novas ideas a gravar.