Inaugurada a campaña de recollida da pataca

A temporada de recollida de patacas arrancou xa oficialmente na Limia, e malia que algún que outro agricultor xa deu comezo a finais de agosto, a Feira Alimagro preparou unha cita para institucionalizar o inicio da campaña.

Á tardiña, reuníanse nunha finca do San Vitoiro, no concello de Xinzo de Limia, varios produtores de patacas de todo o territorio nacional, xunto con alcaldes e concelleiros da contorna, que estiveron acompañados polo director xeral de Gandaría, Agricultura e Industrias Agroalimentarias, José Balseiros.

Durante a cita, o director xeral interesouse pola campaña de recollida, ademais de preguntar pola comercialización do tubérculo e os mercados nos que se vende, así como dos requisitos que se esixen para que o produto estea amparado baixo a IXP Pataca de Galicia.

Ó remate da xornada, deu comezo a III edición das Xornadas Técnicas da Pataca. Comezaron pasadas logo na Casa da Cultura de Xinzo de Limia, onde José Cortijo, de Fertiberia, abriu o ciclo de charlas atendendo ás particularidades da zona vulnerable por nitratos.

Logo, Laura Meno, investigadora da Universidade de Vigo, falou sobre o mildiu da pataca, ó igual que Jordi Rey, de Corteva, que falou sobre o control deste grupo de enfermidades. Ó rematar, celebrouse unha mesa de debate con agricultores de Salamanca, Tenerife (Gran Canaria) e A Limia, acompañados de José Manuel Gómez, presidente da IXP, Servando Álvarez, director do Inorde, e Juan Manuel Coello, director de operacións de Patacas Meléndez.

José Antonio Armada, director territorial do Medio Rural en Ourense, foi o encargado de pechar as xornadas.