A Limia bótalle ovos... e 450 quilos de patacas!

A VI edición da Feira Alimagro retornou cun dos eventos máis agardados polos veciños da Limia, a preparación da tortilla xigante, que cada ano segue aumentando as cantidades empregadas. A media tarde comezaron os preparativos para facer esta tortilla xigante, na que participaron unha decena de persoas. Malia que as patacas xa se fritiran pola mañá, non foi pouco o traballo que quedou para a tarde.

Primeiro, houbo que rachar preto de 1.700 ovos, para acompañar ós 450 quilos de patacas da variedade Kennebec, a máis abundante na IXP Pataca de Galicia. Ademais, tiveron que cortar preto de 40 quilos de cebola.

Máis e máis veciños fóronse achegando ó recinto para desfrutar da tortilla xigante, que se maridou con pan da IXP Pan de Cea e de viño tinto Ladairo.

Cata-Concurso

Malia que a variedade empregada para facer a tortilla foi a Kennebec, a gañadora da cata-concurso de patacas organizado polos Pobos Produtores de Pataca foi a Agria, da Limia, que competía con variedades de todo o país.