A xestión das augas de Xinzo non chegará ó pleno deste xoves

Moción "tumbada"

PSdG-PSOE de Xinzo levou a comisión unha moción na que se instaba ó Concello a xestionar tódalas augas de subministro e someter a controis analíticos as fontes do municipio.

Os membros da corporación local de Xinzo de Limia. | B.L.

Os socialistas lamentan que o bigoberno de ÁXIL e PP a tumbou en comisión “co único fin de evitar que se debatese en pleno e que a veciñanza do municipio tivese información ao respecto”, apuntou Elvira Lama, voceira do PSdG-PSOE.

A moción viña motivada pola preocupación da veciñanza de Gudín, que xa pasaron a xestión da súa auga ao Concello. O grupo socialista apunta que o alcalde, Amador Díaz, e o seu grupo de goberno “néganse a traballar por e para a veciñanza, opóndose a unha moción que pedía dous temas sinxelos”. Amador Díaz aclara que “xa se puxo en marcha a traída de auga de Gudín, e temos analíticas feitas doutros abastecementos para poder falar cos veciños”. “Parece que os males todos veñen deste grupo de goberno, pero seguimos na mesma liña, traballando, e conseguiremos que se adhiran á rede de saneamento”.

Dende o grupo socialista consideran “inadmisibles” as explicacións do alcalde, acunsándoo de “ofrecer escusas de mal pagador para tapar un grave problema para a veciñanza”. A edil socialista subliña que “o único pretexto do alcalde foi que teñen que facer un informe e un inventario e que non convén crear alarma social”. Neste senso destaca que “non estamos falando de crear alarma social, senón de previr posibles problemas de saúde pública”.