Xinzo comeza as obras nas rúas do “barrio de abaixo”

O Concello de Xinzo de Limia vén de dar comezo ás obras de renovación do firme no barrio de abaixo, un dos espazos históricos da vila. A actuación conta cun investimento de 280.000 euros, achegados a través do Plan CooperOU da Deputación provincial de Ourense.

A obra, que conta un prazo de execución de tres meses, estímase que estea rematada o 14 de novembro, segundo indican dende o Concello.

Esta actuación enmárcase na estratexia municipal “Xinzo Paso a Paso”, coa que o Concello pretende revalorizar o centro histórico, recuperando espazos para as persoas ó consolidar unha rede viaria máis accesible e segura.

A intervención atende a nove rúas: Camiño do Regueiro, Serra de San Mamede, Serra de Manzaneda, Pena Trevinca, Serra do Larouco, Serra de Queixa, do Furriolo, do Padrón e Xabier Prado Lameiro. Estas vías levaban décadas sen unha intervención integral, acumulando desgaste e parches que afectaban á comodidade e á seguridade do tránsito.

O alcalde Amador Díaz e o concelleiro de Obras e Mobilidade, Ramón Gómez, supervisaron in situ o inicio dos traballos, que se desenvolverán en fases, para manter os accesos a garaxes e servizos.

“É unha obra necesaria e moi demandada pola veciñanza; imos actuar con criterio e por fases para mellorar a seguridade, o confort e a mobilidade no corazón da vila, avanzando nun modelo de Xinzo coidado e centrado nas persoas”, sinalou Díaz.

Vías principais

As vías principais do barrio de abaixo, Constitución, Galicia, Lepanto e San Roque, contarán cun proxecto “específico”, segundo indican dende o Concello.