Xinzo dá comezo ás obras da súa Praza de Abastos

O Concello de Xinzo de Limia dará comezo ás obras na Praza de Abastos, un edificio que se atopa no corazón da vila e que busca converterse nun dos eixos do comercio local. Os traballos de renovación teñen un prazo de execución de preto dun ano, e mentres se leven a cabo, as prazas de aparcamento perimetrais estarán inhabilitadas e garanterase o acceso aos vados en todo momento.

Os postos que hoxe operan no interior do edificio poderán seguir realizando a súa actividade grazas aos contedores de venda instalados na área para poder atender á clientela durante o período de obras. Ademais, o Concello lembra aos veciños que o novo aparcadoiro gratuíto da rúa Río Arnoia, situado ao carón, conta con máis de 100 prazas de estacionamento.

Dende a corporación municipal comunican que as persoas ou negocios que teñan interese en abrir un posto poden coñecer as condicións e dispoñibilidade a través das canles habituais de información (presencial, teléfono ou sede electrónica) para contactar co Concello. O alcalde de Xinzo de Limia, Amador Díaz, subliña que se trata dunha “obra esperada e necesaria para modernizar o mercado e dinamizar o comercio de proximidade”, e agradece “a comprensión da veciñanza” polos axustes de mobilidade e estacionamento mentres duren os traballos.