Xinzo convértese na capital europea do recreacionismo

A vila de Xinzo despide o Annus Argenteus da Festa do Esquecemento, organizado pola asociación cultural Civitas Limicorum para celebrar o 25 aniversario da festa, e que chega o seu final coa celebración da Asamblea Anual das Festas Históricas Europeas este sábado 18 de outubro na capital limiá. Á cita acudiran representantes da Confederación Europea de Festas e Manifestacións Históricas dende Alemaña, Francia, Italia, Portugal e o territorio nacional, así como as que participarán por videoconferencia.

Durante a xornada abordaranse proxectos conxuntos, intercambios culturais e novas liñas de colaboración entre as festas europeas, co obxectivo de reforzar a rede continental de recreación histórica e promover a cooperación cultural transnacional. Esta xuntanza europea celébrase logo do éxito da celebrada o pasado mes de maio na vila, que deu cita á Asamblea Estatal das Festas Históricas, congregando a máis de cuarenta delegacións.

Marcos Argibay, presidente da asociación Cultural Civitas Limicorum, explicou que é “un orgullo para nós acoller en Xinzo de Limia a amigos e compañeiros representantes das festas históricas de toda Europa”. O presidente incide en que “isto soamente reafirma a capacidade da Festa do Esquecemento para facer de Xinzo capital do recreacionismo histórico”.