Xinzo de Limia e Ecuador estreitan lazos culturais

O Concello de Xinzo de Limia vén de recibir esta semana a visita dunha delegación de artesáns de Tungurahua, dende Ecuador, e que estivo encabezada polo mestre GusArte. A comitiva foi recibida polo alcalde Amador Díaz, acompañado do concelleiro de Cultura, Carlos Gómez. Esta visita dá continuidade a viaxe institucional do alcalde a Tungurahua en 2024 e “serve de base para traballos futuros”: accións divulgativas conxuntas, obradoiros e exhibicións, intercambio de pezas e proxectos educativos. “Falamos de cultura que crea oportunidades e de patrimonio que suma; consolidar esta relación é bo para Xinzo e para a nosa mocidade”, sinalou o concelleiro de Cultura, Carlos Gómez.

“A visita tivo un sentido preciso: poñer en diálogo o Entroido coa Diablada, dous universos festivos que comparten raíz comunitaria, forza simbólica da máscara e transmisión de saberes artesáns”, apuntan dende o Concello. Amador Díaz destacou que “Xinzo é terra de Entroido e cultura; por iso, esta relación con Ecuador encaixa de cheo coa nosa identidade. Queremos abrir pontes estables, aprender mutuamente e proxectar Xinzo cara fóra a través da creación artesá, da música e do noso patrimonio vivo”. Durante o encontro, os artesáns fixeron a doazón dunha máscara tradicional do Diablo de Píllaro, xa depositada e incorporada aos fondos do Museo Galego do Entroido (Mugae).

A delegación coñeceu a artesanía da Pantalla no obradoiro Arte Arrebol, e visitou a Escola Municipal de Gaitas e Percusión. GusArte agradeceu a acollida e subliñou que a doazón “é un xesto de amizade e recoñecemento; na Pantalla de Xinzo atopamos unha irmandade coa nosa máscara do Diablo de Píllaro”.