"Zorelle en Abierto" recolle as principais novas do colexio

Os escolares de 2º de Primaria do colexio Padre Feijoo Zorelle alzáronse co primeiro premio da súa categoría. Con moita ledicia e agradecidos, así recibiron a nova os premiados, tanto o alumnado como a súa mestra Tamara Silva. Ademais, aseguran que se divertiron moito realizando esta actividade coa que aprenderon moito.

Para comezar a elaborar o seu traballo comezaron realizando entrevistas aos profesores do colexio para que lles explicaran os proxectos e as novas do centro. Despois, coa axuda da profesora que dirixiu o traballo, escolleron as fotografías, pegáronnas en cartulinas como se fose un xornal e despois escribiron debaixo as noticias. Entre todos escolleron o nome do xornal, "Zorelle en Abierto".

Entre as novas que recopilaron para elaborar o seu xornal, os escolares destacaron unha que fai referencia ao profesor de Educación Física dos maiores do centro, que é subcampión do mundo de jiujitsu e varias veces entrevistado no xornal La Región.

En conclusión, a experiencia resultoulles estupenda e aseguran que unha das cousas máis divertidas foi entrevistar aos mestres do centro e despois elaborar o que sería o seu propio xornal.