Rexístranse máis de mil alegacións contra a planta de Xunqueira de Ambía

Os colectivos ecoloxistas Stop Eólicos Xurés Celanova, MEL e a plataforma Auga Limpa Xa! fan público que logo de tres semanas acadaron máis de 1.000 alegacións contra o proxecto da planta de Biometano en Xunqueira de Ambía, co apoio dos veciños e veciñas da contorna, activistas do centro social Alvariça de Allariz e os concellos de Xunqueira de Ambía, Sandiás e Xinzo.

Dende a agrupación de organizacións consideran que esta nova industria “se presenta como 'solución' para a xestión dos xurros, mais en realidade agravaría o problema da contaminación por nitratos das augas do Limia”. As alegacións fixéronse a través de rexistros municipais e a Subdelegación do Goberno en Ourense, “elaboradas en base aos escritos contra o proxecto presentados pola asociación ecoloxista Petón do Lobo e polo BNG”, e segundo indican, “deixan patente o rexeitamento social ao plan de Ence na zona afectada e na contorna da Limia, mentres as autoridades competentes evitan enfrontar o grave problema da contaminación dos acuíferos e das masas de auga superficiais que poñen en risco a saúde da poboación.”

O proxecto de Ence

Ence, mediante a súa filial galega Biofertilizantes e Biometano Sertogal Xunqueira, lanzou un novo proxecto industrial en Xunqueira de Ambía, destinada á producción de biofertilizantes e biometano, achegando preto de 25 millóns de euros na planta, que “generará aproximadamente un 90% de fertilizante orgánico y un 10% de gas renovable”, según la empresa.

O proxecto “se caracteriza por un modelo de operación diferencial, diseñado para funcionar sin emitir olores”, apuntan desde Ence, explicando que “favorecerá la desnitrificación de acuíferos gracias a la correcta valorización de estiércoles y purines”, e que “en ningún caso se aplicará el digesto al campo, sino que incorpora una planta de producción de fertilizante orgánico seco de alta calidad, sin emisiones de nitrógeno amoniacal”.