Espadanedo acollerá un concerto contra o lume

O mosteiro de Santa María de Xunqueira de Espadanedo encherase de “música e solidariedade” o domingo 28 de setembro, nun encontro de música tradicional organizado pola Asociación Cultural “Os Xuncos” para estar “ó carón dos nosos gandeiros e gandeiras”, para “abrazalos neste momento tan duro” e, recadar fondos que lles axuden “a levantarse”, explican dende a asociación.

“Eles estiveron en primeira liña, e é unha tristeza enorme ver como se quedaron sen alimento para os animais”, explicou María Alonso, presidenta da asociación, apuntando que a recadación será doada integramente para que “o destinen no que precisen”.

O “Concerto contra o lume” naceu coa idea de “xuntarnos co que mellor sabemos facer, música”. Diferentes grupos e bandas xuntaranse nun mesmo escenario para apoiar a quen “o perdeu todo nos lumes de agosto”. “Nós pensamos en chamar a bandas e grupos da contorna, e todos se animaron sen dubidalo”, explicou María.

No encontro, que dará comezo ás 17,30 horas, participarán nove grupos e bandas dende Casto Caldelas, Arnuíde, Esgos, Trives e Vilariño de Conso, Maceda, Xinzo e Xunqueira de Espadanedo, para “coidar ós gandeiros, que son un piar do rural galego”. Se o tempo o permite, o concerto celebrarase no claustro do mosteiro, e senón farase dentro da igrexa.

Entradas

As entradas teñen un prezo de cinco euros, e poden adquirirse na farmacia, no bar Mosteiro, no bar Muíño ou na Tasquiña en Xunqueira de Espadanedo e en Maceda no Mioco e no Marligo, así como directamente das diferentes bandas e agrupacións musicais que participarán no concerto.