A comarca da Limia pide o Día das Letras para Antón Tovar

O Museo da Limia, no concello de Vilar de Santos, acolleu onte o acto de entrega do premio do certame literario Antón Tovar a Valeria Gutiérrez Caneda, pola obra “Tanto camiñei, camiñei tanto”. O certame, promovido polo Padroado do Museo da Limia co patrocinio do Grupo Tesal (Termas de Monçao), pretende ser unha nova chamada á sociedade galega para que valore o extraordinario legado creativo do autor ourensán.

No acto, que incluíu un recital de poemas de Antón Tovar representado polos nenos do colexio Carlos Cid Arregui de Rairiz de Veiga, e musica da man de Anxo Rei. Asemade, deuse lectura a declaración institucional adoptada hai uns días polo Padroado do Museo da Limia reiterando a Real Academia Galega a petición de que se lle adique a Antón Tovar, do que hoxe conmemórase o 20 aniversario do seu pasamento, o Día das Letras de 2025. “É de xustiza que Antón Tovar obteña o recoñecemento do Día das Letras Galegas”, dixo Delfín Caseiro, presidente do padroado, subliñando que o acordo xa se remitiu a Real Academia Galega. Hai un ano, unha representación do padroado fixo entrega na Real Academia Galega dun expediente completo dos textos e artigos de Tovar, así como de 350 sinaturas de personalidades, representantes institucionais e de asociacións apoiando o recoñecemento. “Daquelas non se acadou, a ver se pode ser para o ano que vén, no 21 aniversario”, dixo Caseiro.