Loita Pediátrica da Limia sinala unha situación “alarmante” este verán

REIVINDICACIÓN

Dende a plataforma sinalan que “o verán vaise cubrir con profesionais non pediatras, con non máis de dúas horas e media por cupo”, malia o “aumento da poboación infantil en xullo e agosto”

Primeira concentración de protesta, da que xurdiu a plataforma pediátrica da Limia.

A plataforma Loita Pediátrica da Limia anunciou que o pasado martes, 2 de xullo, representantes da mesma mantiveron unha reunión co xerente da área sanitaria de Ourense, Verín e O Barco de Valdeorras, José Santiago Camba Bouzas.

Os pais e nais amosaron a súa “sorpresa” ao descubrir que Camba non dispoñía da información actualizada sobre a situación laboral dos dous titulares da praza de pediatría do centro de saúde de Xinzo de Limia.

A plataforma sinala aos representantes do concello limiao, alcalde, tenente de alcalde e concelleira de Asuntos Sociais e Sanidade, “por non ter expresado ao xerente e ao conselleiro de Sanidade, Antonio Gómez Caamaño, a alarmante situación á que nos vemos abocados”.

Verán sen pediatras

Perante esta situación, os membros de Loita Pediátrica da Limia ven a comarca “abocada a non volver a ter as dúas prazas cubertas por pediatras, cando hai 1.700 nenos e nenas”.

Dende a Consellería de Sanidade apuntan que “no caso da atención pediátrica na comarca de A Limia a atención está totalmente garantida durante este mes de xullo”.