Sandiás inviste 50.000 euros para minimizar as perdas de auga na rede

O Concello de Sandiás vén de realizar melloras no abastacemento, co fin de minimizar as perdas, grazas a unha subvención de Augas de Galicia de 48.250 euros.

O Concello xa fixera unha auditoría co obxectivo de cuantificar as perdas de auga detectadas nas instalacións de abastecemento en servizo, tralo que se aprobou un Plan de actuacións.

A análise de detección de fugas levou en primeiro lugar á execución dunha mellora substancial do sistema de control de volume da auga nos depósitos mediante lecturas precisas, en tempo real, que miden e alertan das perdas de auga. Colocáronse válvulas de corte ao principio e ao final de cada sector, e instaláronse caudalímetros ultrasónicos á saída de varios depósitos de distribución de auga en servizo (Vilariño das Poldras, Couso de Limia, Sandiás, Novaiño e Piñeira de Arcos).

Asimesmo, na Estación de Tratamento de Auga Potable (ETAP) do Tesiño, en Cardeita, substituíuse o dispositivo de comunicacións de adquisición de datos por unha versión máis moderna, e executáronse obras de sectorización das redes de abastecemento de auga nos núcleos de Couso de Limia e Piñeira de Arcos.

Placas fotovoltaicas

Recentemente, o Concello investira preto de 40.000 euros na instalación de placas fotovoltaicas de 500 watios na ETAP do Tesiño, co obxectivo de mellorar a eficiencia enerxética destas instalacións coas enerxías renovables.

Estas dúasactuacións no abastecemento buscan aforrar na factura enerxética e cumprir os obxectivos ambientais marcados polo grupo municipal nun escenario de cambio climático.