Samaín castrexo de Xinzo de Limia: datas e programa completo

A Praza Maior de Xinzo de Limia será o escenario dun Samaín galaico-castrexo, ou “Samhain” en lingua gaélica, o vindeiro 2 de novembro, cunha nova celebración que busca recuperar as raíces máis antigas e espirituais da cultura castrexa de Galicia.

O evento, organizado en colaboración entre o Concello de Xinzo e a asociación cultural Civitas Limicorum, busca conectar coa tradición celta e castrexa da comarca, no canto do Halloween estadounidense que vén gañando terreo nos últimos anos.

O concelleiro de festas, Ricardo Sieiro, está a coordinar este vento xunto con Civitas Limicorum, organizadores da Festa do Esquecemento, e espérase a participación de diversos colectivos sociais, culturais e asociativos de toda A Limia.

Ademais, a colaboración coas asociacións de pais e nais dos colexios e institutos permitirá que a comunidade educativa se sume tamén a esta nova iniciativa.

Marcos Argibay, presidente de Civitas Limicorum, recoñece que levan traballando neste Samaín “dende o remate do Esquecemento e, como en xuño fixemos o evento das Vestalias, agora tocaba un de índole castrexa”.

Samaín infantil

A xornada estará dividida en tres partes ben diferenciadas co obxectivo de abranguer a público de tódalas idades. Así, primeiro terá lugar un Samaín infantil pola tarde, cun enfoque lúdico e didáctico, que contará con presenza dos rapaces dos colexios da vila, que poderán desfrutar dunha chocolatada de balde.

Á caída do sol comezará o Samaín castrexo, coa recreación do ritual celta, que evoca as antigas crenzas que marcaban o fin da colleita e o comezo do inverno na cultura galaica. Nesta celebración servirase caldo castrexo e queimada de forma gratuíta.

E por último, haberá tamén o Samaín da xuventude, co que se rematará este novo evento, e no que se celebrará unha festa pola noite con DJ.