O BNG dalle luz verde ás contas de Allariz para o exercicio 2016

A Corporación municipal de Allariz deulle onte á tarde luz verde ós presupostos do Concello para o vindeiro ano 2016, co voto a favor dos nove concelleiros do BNG que respaldan ó grupo de goberno, e o voto en contra dos tres edís do PPdeG. A concelleira do PSdeG non puido asistir á sesión plenaria por motivos laborais.

O goberno que preside o nacionalista Francisco García xestionará un total de 6,1 millóns de euros, cantidade á que ascenden os ingresos previstos, mentres que os gastos chegarán ata os 5,6 millóns. A diferencia de medio millón de euros servirá para facer fronte ó remanente de tesourería negativo do exercicio anterior.

O capítulo adicado a investimentos supera os 866.000 euros, un 15% do total dos orzamentos, capítulo no que terá unha prioridade principal o desenvolvemento do Programa RE de reciclaxe e tratamento de residuos orgánicos, xunto coa mellora da eficiencia enerxética. Entre os investimentos previstos resaltan tamén a potenciacion do parque empresarial de Chorente, as intervencións na Reserva da Biosfera, xunto coa pavimentación da rede viaria municipal e a mellora de infraestructuras e servizos incluidos no programa estratéxico Allariz 2020.

Neste capítulo de investimentos o Concello tamén resalta a VII edición do Festival Internacional de Xardíns e o programa de escavacións no Castro de Armea, polo retorno económico que xeran.

O alcalde alaricano, Francisco García, considera que estas contas reforzarán o papel do concello "como locomotora da actividade económica", xunto co mantemento e mellora dos equipamentos e servizos públicos, "que incrementan a calidade de vida dos veciños".

No capítulo dos gastos, os referidos ó persoal son os de maior entidade, con 2,1 millóns de euros, que García xustifica pola "ampla carteira se servizos que xestiona directamente o Concello.n