A Empanada foi a raíña no campo de Vilanova alaricano

A Festa da Empanada cambiou de localización para celebrar a súa última xornada cunha festa campestre, que estivo ateigada de actividades e actuacións.

Este domingo estival deu comezo pola mañá co pasarrúas da Banda Cultural Instructiva Musical Genovés, chegados dende Valencia, pondo a música antes do desfile de Xigantes e Cabezudos.

Ás 12,00 horas, os tradicionais personaxes saíron dende a praza do Matadoiro acompañados do grupo de gaitas De Pé Feito ata chegar ó Campo de Vilanova, onde centos de veciños os esperaban.

Alí, a banda de música de Valencia ofreceu un concerto que puxo banda sonora ó xantar, que consistiu en polbo e churrasco, e como non podía ser doutro xeito, acompañados de empanada e viño.

A sobremesa e a troula continuaron ata a tardiña co concerto de Os d’Abaixo, “15 anos ao carón da tradición”, ás 19,30 horas.

A Festa da Empanada rematou cun baile popular nos Xardíns do Museo do Coiro a cargo da orquestra La Oca Band e que fixo mover os esqueletos dos alaricanos dende as 21,00 horas.