Maceda arranxa viais e cunetas do termo municipal

O Concello de Maceda continúa realizando, a través dos seus operarios, tarefas de limpeza e mantemento de cunetas e viais de todo o municipio. Este labor complementa ao xa desenvolvido coa limpeza de viais e o seu obxectivo é contribuir, con recursos municipais -tamén se incorporou un traballador do programa Aprol e dous da Risga- ao coidado, limpeza e seguridade nestes entornos.

“Os traballos de desbroce e limpeza son continuos tanto no rural como na vila. O periodo entre as actuacións ás veces resulta longo porque ven determinado pola meteoroloxía, circunstancia esta compensada pola profesionalidade dos nosos traballadores municipais”, explicou Ana María Rodríguez Blanco, Concelleria de Medioambiente e Servizos Sociais no Concello de Maceda. “Polo que agradecemos á veciñanza a actitude de comprensión. Sen pausa, conseguimos ir atendendo as necesidades”, engadiu a edil.

Por outra banda, a responsable de Medioambiente neste municipio quixo valorar tamén “en positivo” o feito de que “os veciños e as veciñas contacten co Concello para expoñer situacións que consideran necesarias dunha actuación. Tamén a colaboración no respecto e coidado do noso entorno”.