Óscar Doviso, director do festival de curtas de Allariz: “Ofrecemos comedia e humor para todos”

Nesta entrevista Óscar Doviso fai unha valoración desta última edición e do futuro do festival RiR de Allariz.

Que valoración fai desta séptima edición do RiR?

Dende logo que moi positiva, porque seguimos a medrar de forma totalmente sostible, pasiño a pasiño. Isto nos dá pé a sentar unhas boas bases, e tamén un público fiel, que vemos que repite edición tras edición. Iso significa que a programación é acorde para facer as delicias da xente, e que funciona moi ben o boca a boca. Os espectadores van vindo con máis xente, polo que cada vez temos máis público.

É importante contarmos con festivais máis alá das cidades.

Moito, cómpre xerar unha rede de festivais audiovisuais para o futuro. Nós por exemplo temos moitísima cativada, e esta é a forma de inculcar o valor do audiovisual e de fomentar neles o amor polo cinema. Todos lembramos cando éramos pequeniños ver algo en pantalla grande. E iso hoxe, por desgraza, estase perdendo.

É clave atopar un nicho?

Dende un primeiro momento, antes da edición número un, tiña moi claro que un festival sempre debe ter unha temática e un obxectivo claros. Do contrario o público anda perdido, porque ti, como creador, tamén andas perdido. Como normalmente soen ser de xéneros fantásticos ou de terror, pois pensamos que a comedia era o ideal. Ademais Allariz é unha vila moi familiar, á que acuden moitas familias con nenos. E a comedia que ofrecemos é apta para tódolos públicos. Non é que sexa infantil, senón que é para todos, que é diferente. Desa forma para as familias é unha liberación, non teñen que pensar, “e agora que facemos cos nenos?” E todos desfrutan, porque os rapaces séntense un espectador máis.

Por onde pasa o futuro do RiR?

Por seguir medrando paseniño, cunha programación sempre de calidade. Para nós é moi importante coidar e mimar, sobre todo, a selección oficial. Este é un festival fundamentalmente de curtametraxes, E aí queremos pór a maior atención. E ademais pór en valor o noso medio rural, por iso estamos no pacto pola cultura sustentable.

Que supón para vostede dirixir este certame?

Eu desfruto tanto do proceso como da direción e os resultados. Levo dende o inicio na produción do festival xunto co José Freiría, de Escena Sonora. Pero o máis bonito é ver xente maior, que igual vive soa, vir e pasalo en grande.