O Parque Ansuiña, en Baños de Molgas, sen fume

A iniciativa “Espazos Sen Fume” continua crecendo coa presentación do espazo máis votado no Concello de Baños de Molgas, o cal é o Parque Ansuiña.

A veciñanza elixiu o seu espazo libre de fume en Baños de Molgas. Esta iniciativa é unha proposta da Asociación Española contra o Cancro para promover a creación de ambientes libres da exposición ao fume nocivo do tabaco tradicional e electrónico, en espazos abertos de uso público e colectivo, con independencia da súa titularidade pública ou privada.

“É xerar contornas saudables para protexer a nosa saúde e previr enfermidades”, explican dende a Asociación Española contra o Cancro, que xurde como unha acción concreta para apoiar e complementar a estratexia actual fronte ao tabaquismo fixando a mirada na protección da saúde dos menores.

“O tabaco é causante dun dano importante sobre o medio ambiente que excede o ciclo de vida do cigarro. Empeora a calidade do aire mesmo en espazos abertos e contamina o chan e a auga durante moito tempo a través das cabichas”, comunican dende Asociación Española contra o Cancro.

“Con esta iniciativa búscase promover unha vida libre de fume que protexa, sobre todo, á poboación xuvenil; desnormalizar o hábito de fumar en espazos convivenciais públicos, reforzando o papel modélico positivo dos adultos en relación co consumo de tabaco, e incentivar o abandono do hábito tabaqueiro e axudar no proceso”, detallan dende a Asociación Española contra o Cancro.

O plan de actuación para seleccionar o espazo consistiu na realización dunha votación accesible a toda a poboación a través das canles dixitais da Asociación Española contra o Cancro e do Concello de Baños de Molgas.