Allariz celebra a VII Feira dos Produtos Apícolas

O Concello de Allariz, xunto coa Asociación Galega de Apicultura (AGA), organizan a VII Feira dos Produtos Apícolas, que se celebrará o vindeiro sábado, 13 de setembro, na Praza do Matadoiro alaricana, dende as 10:00 ata as 20:00 horas.

A Feira dos Produtos Apícolas non só pon en valor o traballo dos apicultores e a calidade dos seus produtos, senón que tamén subliña o papel fundamental da apicultura na conservación do medio ambiente e na economía local. Por iso, durante a xornada unha ducia de postos ofrecerán ó público unha gran diversidade de produtos da colmea, dende meles de diferentes variedades, pole, própole e cosmética apícola ata elaboracións innovadoras ou derivados, como candeas.

Ademais de ser un espazo de venda, a feira pretende ofrecer unha experiencia educativa e de concienciación arredor da apicultura e da súa importancia para a biodiversidade, polo que seofrece un programa que combina tradición, divulgación e actividades para toda a familia. Ás 11,30 horas realizarase o obradoiro sobre apicultura e biodiversidade con As Curuxas, unha actividade didáctica para o público infantil. Logo, ás 12,30 horas, haberá unha degustación de produtos da Reserva da Biosfera maridados con mel, da man de Moixo-Cociña, que mostrará como o mel potencia e harmoniza sabores da gastronomía local.

Para rematar, ás 18,30 horas terá lugar o espectáculo familiar “Miña terra, meu lar”, a cargo de A Trastenda dos Contos con Caxoto, que mestura narración oral, humor e concienciación ambiental, e ó peche desta edición da feira, haberá un sorteo de varias cestas para todos aqueles que mercaron ao longo do día