Allariz impulsa a súa rede de compostaxe veciñal

Allariz prosegue o programa para impulsar a súa Rede de Compostaxe, que este sábado celebrara a súa segunda xornada de reparto de material en distintos locais sociais do Concello.

A aposta da administración local pola compostaxe doméstica e comunitaria forma parte do seu compromiso cun modelo de xestión sostible dos residuos, polo que o pasado sábado celebraron as primeiras xornadas abertas á veciñanza no Mercado da Reserva, onde se explicou o funcionamento da rede, os seus beneficios ambientais e o proceso de participación no programa municipal.

Os interesados recibiron material informativo e parte do equipamento necesario para a compostaxe, que amosa un crecente interese por parte da veciñanza, xa que se repartiron un total de 50 caldeiros e de 10 composteiros. O Concello conta con 100 composteiros novos e 400 caldeiros para repartir entre os interesados, para facilitar a separación dos restos orgánicos e aproveitar, de xeito responsable, os biorresiduos.

O Concello entregaralle ós grandes produtores que se queiran sumar á iniciativa colectores con chaves para que deixen fóra do local, así como colectores de pedal para o uso interior dos establecementos.

Este sábado 18 de outubro as xornadas informativas achegaranse ós locais sociais de San Vitoiro, Coira e Torneiros, comezando ás 10,00, 11,30 e 13,00 horas respectivamente. O vindeiro sábado, 25 de outubro, será a derradeira no Campo da Barreira dende as 11,00 ata as 13,00 horas. O persoal técnico ofrecerá asesoramento e resolverá dúbidas sobre o proceso de compostaxe, a correcta separación dos residuos e o uso dos composteiros. Ademais, os martes 21 e 28 de outubro as persoais interesadas poderán recoller o seu caldeiro ou composteiro na Praza Maior dende as 11,00 ata as 13,00 horas.

As actuacións están cofinanciadas pola Xunta de Galicia e pola Unión Europea no marco do Plan de recuperación, transformación e resiliencia, a través do Mecanismo de recuperación e resiliencia da UE.