“Arte nas mans”, a aposta da Xunta pola artesanía galega

O campamento de verán “Arte nas mans: una viaxe pola artesanía”, é unha iniciativa conxunta da Consellería de Emprego, Comercio e Emigración e a Consellería de Cultura, Lingua e Xuventude desenvolvida por primeira vez este ano e dirixida a persoas de entre 18 e 30 anos. Esta fin de semana recibiu a visita do director xeral de Comercio e Consumo, Gabriel Alén, acompañado da xerente da Fundación de Artesanía de Galicia, Elena Fabeiro e a alcaldesa de Allariz, Cristina Cid.

Esta actuación enmárcase no programa Acción de Verán 2025, que tivo lugar no albergue de Allariz, onde 30 persoas participantes afondaron nos oficios artesanais. O director xeral, puxo de relevo a aposta da Xunta a prol da atracción de talento mozo e da remuda xeracional na artesanía de Galicia con accións de difusión ligadas ao territorio. A cifra de participantes no campamento está incluída nas 11.630 prazas que a Xunta ofrece na súa programación estival deste 2025, sendo a maior oferta da súa historia.

Neste campamento desenvolvéronse obradoiros de reciclaxe e técnicas de papel, impartidos por Peixesapop; de cestería, a cargo de Julia de la Cal-La Parabólica; de estampaxe téxtil de La Platanera e o de torno cerámico, que imparte Carlos San Claudio. Gabriel Alén subliñou o valor da artesanía como emprendemento ligado ao territorio.