A Xunta reafirma o seu apoio á Fundación Juan Soñador

IGUALDADE DE OPORTUNIDADES

O director xeral de Familia, Infancia e Dinamización Demográfica, Jacobo Rey, acompañou esta mañá aos nenos e nenas do campamento de verán da Fundación Juan Soñador en Allariz, nunhas instalacións que o director xeral calificou de “primeiro nivel”

Jacobo Rey durante a visita ó campamento. | Lucía Otero

Neste encontro, reafirmou o compromiso da Xunta con esta entidade social para seguir impulsando iniciativas que fomenten a igualdade de oportunidades entre todos os menores.

“O campamento é o broche final do programa de ocio e tempo libre que desenvolve esta fundación en colaboración ca Xunta”, apuntou Rey, “é o mellor momento de todo o curso para moitos deles, despois de todo o ano esforzándose”.

Durante a xornada, o director xeral participou cos rapaces nas diferentes actividades que realizaron nas instalacións da Fundación Ramón González Ferreiro, que conta entre outros recursos didácticos, cunha granxa escola. Alí, constatou a importancia da colaboración entre as Administracións e o tecido asociativo para chegar a máis familias e mellorar a situación da mocidade máis vulnerable, garantindo servizos fundamentais como a conciliación familiar.

“Esta entidade traballa con eles todo o curso para atender as tarefas de ocio, tempo de lecer, reforzo escolar e atención socioeducativa”, apuntou Rey, aclarando que a Xunta achega cada curso 170.000 euros para este programa.

Jacobo Rey trasladou o compromiso da Xunta de seguir traballando a prol das familias galegas, poñendo a súa disposición recursos e servizos fundamentais.