A “Casa de Rosalía” chega á Alameda alaricana

A exposición “A Casa de Galicia. 50 anos da Casa de Rosalía” instalouse onte na Alameda de Allariz. A mostra repasa a historia do museo e recorda o fito que supuxo en pleno franquismo conseguir mercar, restaurar e musealizar este edificio grazas á colaboración de milleiros de persoas.

Esta mostra estará exposta na Alameda alaricana ata o vindeiro venres, 13 de xuño. Está comisariada por Pepe Barro, quen tamén é o autor da museoloxía da Casa-Museo, que abriu o 15 de xullo de 1971, grazas á implicación de milleiros de persoas e entidades de todo o país e da emigración.

A historia desta casa é a historia dun logro colectivo, xa que pouco despois da morte de Rosalía ficou baleira, e non foi ata despois de varios intentos que puido ser mercada en 1946 por Xosé Villar e Xosé Mosquera.

O Padroado Rosalía, que se creou e 1947 co obxectivo de recuperar a “Casa da Matanza”, converteuse en refuxio do galeguismo, realizando actos como a Misa de Rosalía en Bonaval, que servían de encontros de afirmación galeguista, nos que participaban centos de persoas.

Grazas a proposta de José Manuel Rey de Viana, realizada no Pedrón de Ouro de 1970, organizáronse colectas en moitas vilas e centros galegos na emigración, ós que se uniron máis de 60 concellos, bancos, equipos de fútbol e asociacións de todo o país, sendo algúns deles o Celta de Vigo, a Federación Galega de Ciclismo e a Federación de Caixas de Aforros.

Ata 1951 non se realizou a primeira restauración deste edificio, grazas ós planos de Gómez Román, pero foi en 1971 cando finalmente abriu as súas portas, grazas a implicación de tantas persoas que conseguiron xuntar preto de un millón de pesetas nese ano. Da montaxe e dirección do Museo encargouse Xosé Filgueira Valverde.

O concello de Allariz é mecenas da Casa de Rosalía dende o ano 2022.