Críticas ao uso de datos dos alumnos alaricanos

A Asociación de Familias do IES Allariz, AFA Vilanova, vén de comunicarlle ao Delegado Territorial de Educación en Ourense un escrito detallando o seu malestar pola apertura e uso de contas de Google Workspace for Education “a menores de 14 anos sen a autorización previa dos seus titores legais, tal e como marca a normativa vixente en materia de protección de datos”, segundo indican. Asesorada polo Instituto Nacional de Ciberseguridade (Incibe) e pola Axencia Española de Protección de Datos (AEPD), a AFA fixo fincapé en que “o consentimento en materia de protección de datos debe ser previo, informado e libre, e ningún centro educativo pode vulnerar estes dereitos fundamentais”.

Estas contas foron “creadas sen consentimento e fóra dos medios oficiais da Consellería no inicio do curso 2024/2025”, e explican que “segundo expuxo o xefe de estudos, estas contas créanse porque a Consellería non proporciona alternativas” e por considerar “fundamental” que o alumnado as empregue. A AFA subliña que “a competencia dixital do alumnado non se acadará a través da imposición de servizos comerciais alleos á administración nin mediante prácticas que vulneran dereitos básicos de protección de datos” e que “empregando ferramentas oficiais e adaptadas ao ámbito educativo -Aula Virtual, Abalar, Boxabalar-, garantan a privacidade do alumnado”.

“No mes de novembro de 2024, o centro entregou ás familias un documento para autorizar a continuidade destas contas, xa abertas previamente sen permiso. Moitas familias asinaron presupoñendo que toda comunicación procedente do centro é correcta e conforme á legalidade”, afirman no comunicado. A AFA reuniuse o pasado curso con dous inspectores diferentes, trasladándolles por escrito e de forma presencial a problemática relativa “ás máis de 240 contas de Gmail creadas sen autorización”, apuntando que “non se adoptou ningunha medida, e as contas permaneceron activas ata final de curso”. Este setembro, “o instituto volveu crear contas de Google con nome e apelidos de menores sen solicitar previamente ningún permiso”, afirman dende a AFA.

Dende a Consellería de Educación confirman que non está permitido o uso destas contas nos centros educativos e que hai pronunciamentos ao respecto por parte da AEDP, pero que “se ben é certo que os centros, ás veces, actúan con boa fe desde o descoñecemento”. No caso do IES de Allariz, a Consellería venlle de comunicar á dirección do centro que “non pode empregar estas ferramentas de Google” e que o centro “comprometeuse a que se vai poñer en contacto coas familias para explicarlles a situación e eliminar o seu uso”.