López-Barxas convida os novos a ler Castelao en Allariz

Logo da presentación dos dous novos libros de Francisco López-Barxas, “Castelao entre Nós” e “Os soños de Daniel”, editados por Teófilo Edicións, no Museo da Limia o pasado mes de outubro, o autor e xornalista adicounos unha mañá en Allariz para falar da figura protagonista das obras.

Os libros son unha invitación a coñecer a vida de obra de Castelao. “Castelao entre Nós”, en palabras de López-Barxas, é unha biografía ficcionada, “na que partindo da súa vida e obra, Castelao fala de si mesmo”. Facendo un percorrido “moi xornalístico” da súa vida, o autor deixa falar a Castelao “arredor das cousas que dixo e das que dixeron del” a través dunha escolma de textos propios de Castelao e doutros autores, que se suman á recompilación de poemas dedicados a el, formando unha “coroa literaria de prosa e verso”.

López-Barxas define o libro como unha obra “moi xornalística, pero con certo grao de ficción”, reflectido no modo de expresión, mais “non nas cousas que se contan”. Esta “obra para quen non leu a Castelao” foi un reto moi importante para o autor, xa que nel pretendeu plasmar a “satisfacción enorme que foi para min reler a Castelao” e que lle chegase ao lector, ao tempo que “achegaba algo novo que non se fixera sobre a súa figura”. “O gran reto foi atopar o xeito de que Castelao apareza da maneira máis sinxela para o lector que nunca se achegou a él”.

Nas cubertas de “Castelao entre Nós” aparece a Carta Xeométrica de Galicia feita por Domingo Fontán, o primeiro mapa físico realizado con medicións matemáticas. Este mapa ten especial importancia, xa que é un dos protagonistas da outra obra, “Os soños de Daniel”, un libro para “cativos e rapazada” no que López-Barxas intenta achegar a infancia e adolescencia de Castelao, que “comeza a debuxar nese mapa as cousas que el soña para Galicia: cruceiros, pontes, escolas... ata que se decata de que os debuxos van desaparecendo e precisa de moitas mans e moitos lapis para poder plasmalos”, reflectindo que Galicia se constrúe entre todos mediante o diálogo e a cooperación.

“Eu penso que Castelao non pode ser mellor espello para a xente nova, non só en canto o pensar senón en canto ao que fixo, o que lle preocupou e o que soñou”, afirma o escritor, xa que, en definitiva, "foi un soñador que o plasmou a través da arte, da literatura, da política, da lingua e do compromiso con ese país feliz que desexaba para a xente".

“Eu sei que hai moitísimos novos que hoxe fan o que facía Castelao, non cun caderno senón cunha pantalla, pero o importante é darlle un sentido construtivo e crítico co mundo que eles viven”, reflexionou López-Barxas ao falar das “Cousas” de Castelao, un xénero literario “que lle debemos exclusivamente a el”. “Castelao é un autor especial, xa que participa da alta cultura e da cultura popular”, apuntou, póndoo como exemplo “de pór Galicia diante de todo, das ideoloxías e partidos”.

Así, o xornalista advertiu sobre as implicacións dos avances tecnolóxicos no eido da comunicación, que “ofrecen unha serie de posibilidades incribles”. Porén, advirte, “teñen o perigo de darlle credibilidade a un mundo que xira en torno as mentiras das Fake News e os Deep Fake”.