A piscina de Allariz estreará cuberta e unha planta solar

O Concello de Allariz aposta pola eficiencia nos servizos públicos con dúas actuacións na piscina municipal: a renovación da cuberta e a instalación dunha planta solar fotovoltaica. A primeira renovarase coa colocación de novos paneis tipo “sandwich” de 30 mm. que mellorarán o illamento térmico e a estanquidade do edificio, ademais dun aforro enerxético significativo.

En paralelo, instalarase unha planta solar fotovoltaica de 50 kW para autoconsumo, que aproveitará a enerxía solar para reducir o consumo eléctrico da piscina. A instalación permitirá ademais verter á rede a enerxía sobrante, grazas ao sistema de compensación simplificada de excedentes. A actuación inclúe tamén a retirada e correcta xestión dos antigos paneis solares térmicos, que xa non están en funcionamento.

Con estas dúas obras, Allariz reafirma a súa aposta pola innovación, a eficiencia enerxética e a mellora continua dos servizos locais. A mellora das infraestruturas non só responde a necesidades técnicas, senón tamén ao compromiso político cun modelo de concello que pon ás persoas no centro e coida os espazos públicos e o medio ambiente.

Financiamento

A cuberta está cofinanciada pola Consellería de Presidencia, Xustiza e Deportes, en colaboración co Concello de Vilar de Santos, ao abeiro dunha orde para a mellora de infraestruturas e equipamentos municipais. A planta solar está cofinanciada polo Feder, no marco do Programa Galicia 2021-2027.